Lóð Vesturbæjarskóla endurgerð í sumar

Umhverfi Framkvæmdir

""

Framkvæmdir við fyrsta áfanga endurgerðar á lóð Vesturbæjarskóla munu hefjast í sumar.

Borgarráð samþykkti á fundi sínum í dag að heimila umhverfis- og skipulagssviði að bjóða út framkvæmdir við fyrsta áfanga endurgerðar skólalóðar Vesturbæjarskóla. Kostnaður við verkið er áætlaður 120 milljónir króna. Framkvæmdir eru áætlaðar á tímabilinu maí til september.

Í fyrsta áfanga verður svæðið þar sem áður stóðu færanlegar kennslustofur endurgert. Komið verður fyrir nýjum leiktækjum, yfirborð og lagnir verða endurnýjaðar ásamt gróðri.

Áætlað er að framkvæmdir við annan áfanga verði sumarið 2020 en þá verður komið fyrir gervigrasi þar sem nú er svokallað flutningshús við Hringbraut 116 – 118. Áætlun gerir ráð fyrir að sá áfangi kosti 75 milljónir króna.

Ný og glæsileg viðbygging við Vesturbæjarskóla var tekin í notkun í haust og íþróttasalur skólans stækkaður. Viðbyggingin myndar gott skjól á skólalóðinni auk þess sem rýmra verður um allt skólastarfið og starfsaðstaða þægilegri.

Í fyrra var komið fyrir hjólagrindum við skólann til að læsa reiðhjólum við en þær eru mikið notaðar af nemendum og starfsfólki. Undanfarin ár hefur verið lögð áhersla á að bæta aðstöðu fyrir reiðhjólafólk við stofnanir og skóla í Reykjavík.