Nýtt torg á Klambratúni er tilbúið. Aðalhönnuður þess er Elízabet Guðný Tómasdóttir, landslagsarkitekt hjá Landslagi. Torgið opnar möguleika á að færa mannlífið á Klambratúni inn á Kjarvalsstaði og starfssemi safnins út undir bert loft.
Ólöf Kristín Sigurðardóttir, safnstjóri Listasafns Reykjavíkur, segir tilkomu torgsins tengja safnið betur við Klambratún og að í framtíðinni muni það verða nýtt með margvíslegum hætti í sýningarstarfinu.
Torgið er hannað með með listrænu yfirbragði sem endurspeglar hönnun Kjarvalsstaða sem teiknaðir voru af Hannesi Kristni Davíðssyni, arkitekt, en safnið er orðið eitt helsta kennileiti borgarinnar. Steyptir setstallar við torgið eru gerðir úr sjónsteypu sem er einmitt eitt helsta sérkenni safnsins.
Stærsti stallurinn framan við safnabygginguna skapar skjólgóðan áningarstað og viðburðatorg sem nýtist fyrir stórar og minni uppákomur, óháða og í beinum tengslum við starfsemi listasafnsins.