Það var Katrín Einarsdóttir, einstæð tveggja barna móðir, sem fékk afhenta lykla að fyrstu íbúðinni sem fer í útleigu hjá íbúðafélaginu Bjargi í gær. Hún hefur búið um nokkurt skeið í einu herbergi heima hjá foreldrum sínum ásamt börnum sínum, sem eru fjögurra og tíu ára gömul, og því kærkomið að komast í nýja íbúð.
Björn Traustason framkvæmdastjóri Bjargs afhenti Katrínu lyklana að íbúðinni sem íbúðarfélagið setur á leigu. Dagur B. Eggertsson, borgarstjóri ávarpaði gesti ásamt Drífu Snædal, forseta Alþýðusambands Íslands og Sonju Ýr Þorbergsdóttur, formanni BSRB.
Þessum íbúðum, ásamt þeim 563 sem eru í byggingu til viðbótar á vegum Bjargs íbúðarfélags er ætlað að tryggja tekjulágum fjölskyldum á vinnumarkaði, félagsmönnum í ASÍ og BSRB, aðgengi að hagkvæmu, öruggu og vönduðu íbúðarhúsnæði í langtímaleigu. Miðað er við að greiðslubyrði leigu fari ekki yfir 25% af heildartekjum leigjenda, að teknu tilliti til húsnæðisbóta.
Áætlað er að afhenda leigjendum 141 íbúð til viðbótar í ár eftir því sem húsnæðið verður tilbúið. Þær íbúðir eru við Móaveg, í Asparskógum og í Urðarbrunni. Unnið er að hönnun 490 íbúða til viðbótar í Bryggjuhverfinu, Gelgjutanga, og Skerjafirði í Reykjavík, og í Hafnarfirði, Þorlákshöfn, Sandgerði og á Selfossi.
Mikil uppbygging framundan hjá borginni
Til stendur að halda áfram uppbyggingu húsnæðis í samræmi við þörf og fjármagn. Sveitarfélög vinna húsnæðisáætlanir til að meta þörfina og leggur Bjarg að sögn áherslu á að eiga í góðu samstarfi við þau um frekari uppbyggingu á komandi árum.