Tilkynnt var um val á Íþróttafólki Reykjavíkur í dag. Borgarstjórinn í Reykjavík, Dagur B. Eggertsson og formaður Íþróttabandalags Reykjavíkur, Ingvar Sverrisson, afhentu íþróttafólkinu og forsvarsmönnum íþróttafélaganna verðlaunin í dag.
Allt frá árinu 1979 hefur stjórn Íþróttabandalags Reykjavíkur valið Íþróttamann Reykjavíkur og var þetta því í 41.sinn sem hátíðin fór fram. Í ár voru í sjöunda sinn kjörin Íþróttakarl, Íþróttakona og Íþróttalið Reykjavíkur en í fyrsta sinn í ár voru tvö lið valin, eitt karlalið og eitt kvennalið.
Íþróttakarl Reykjavíkur 2019 er kraftlyftingamaðurinn Júlían Jóhann Karl Jóhannsson úr Glímufélaginu Ármanni. Júlían setti heimsmet í réttstöðulyftu og varð í þriðja sæti samanlagt á HM ásamt því að setja Íslandsmet.
Íþróttakona Reykjavíkur 2019 er knattspyrnukonan Margrét Lára Viðarsdóttir úr Knattspyrnufélaginu Val. Margrét Lára varð Íslandsmeistari með Val í sumar en hún hefur skorað 255 mörk í 180 leikjum í meistaraflokki ásamt því að leika 124 landsleiki og skora í þeim 79 mörk, fleiri en nokkur önnur Íslensk knattspyrnukona.
Íþróttalið Reykjavíkur í kvennaflokki 2019 er lið Vals í körfuknattleik kvenna sem varð bæði Íslands- og bikarmeistari á árinu. Íþróttalið Reykjavíkur í karlaflokki 2019 er lið KR í körfuknattleik karla sem varð Íslandsmeistari á árinu.
Tólf einstaklingar og fimmtán lið frá tíu félögum voru verðlaunuð fyrir frábæran árangur á árinu 2019 í dag. Íþróttafólkið og íþróttafélögin sem að liðunum standa fengu bæði áletraða verðlaunagripi og peningastyrk í verðlaun. Íþróttabandalag Reykjavíkur og Íþrótta- og tómstundaráð Reykjavíkur veittu styrkina.
Liðin sem fengu verðlaun fyrir árangurinn á árinu 2019:
- Ármann – Íslands- og bikarmeistarar í sundknattleik
- ÍR – Íslandsmeistarar í keilu
- Júdófélag Reykjavíkur – Bikarmeistarar í júdó
- Keilufélag Reykjavíkur – Bikarmeistarar í keilu
- KR – Íslandsmeistarar í knattspyrnu karla
- KR – Íslandsmeistarar í körfuknattleik karla
- Skylmingafélag Reykjavíkur – Íslandsmeistarar í skylmingum
- TBR - Íslandsmeistarar í liðakeppni í badminton
- Valur - Íslandsmeistarar í knattspyrnu kvenna
- Valur – Íslands- og bikarmeistarar í handknattleik kvenna
- Valur – Íslands- og bikarmeistarar í körfuknattleik kvenna
- Víkingur – Bikarmeistarar karla í knattspyrnu
- Víkingur - Íslands- og bikarmeistarar í borðtennis
- Víkingur – Íslandsmeistarar í tennis
- Þórshamar - Íslandsmeistarar karla í kata
Einstaklingarnir sem fengu verðlaun fyrir árangurinn á árinu 2019:
· Arnar Davíð Jónsson, Keilufélagi Reykjavíkur
· Ásdís Hjálmsdóttir, frjálsíþróttadeild Ármanns
· Bergrún Ósk Aðalsteinsdóttir, frjálsíþróttadeild ÍR
· Guðbjörg Jóna Bjarnadóttir, frjálsíþróttadeild ÍR
· Guðmundur Ágúst Kristjánsson, Golfklúbbi Reykjavíkur
· Helena Sverrisdóttir, körfuknattleiksdeild Vals
· Íris Björk Símonardóttir, handknattleiksdeild Vals
· Júlían Jóhann Karl Jóhannsson, kraftlyftingadeild Ármanns
· Kári Árnason, knattspyrnudeild Víkings
· Margrét Lára Viðarsdóttir, knattspyrnudeild Vals
· Óskar Örn Hauksson, knattspyrnudeild KR
· Snorri Einarsson, Skíðagöngufélaginu Ulli
Við sama tækifæri var nýr söguvefur Íþróttabandalags Reykjavíkur opnaður í tilefni af 75 ára afmæli bandalagsins auk þess sem Íþróttabandalagið fékk viðurkenningu frá ÍSÍ sem Fyrirmyndarhérað ÍSÍ. Í tilefni dagsins bauð borgarstjórinn, Dagur B. Eggertsson, til móttöku í Tjarnarsal Ráðhúss Reykjavíkur.