Umferð á reiðhjólum jókst áberandi mikið í vikunni í Reykjavík. Hjólateljarar í Nauthólsvík og á Geirsnefni sýna tvöföldun umferðar eftir að götur og stígar urðu auðir.
Mánudaginn 26. febrúar mældust 211 reiðhjól á stígnum í Nauthólsvík en daginn eftir voru 411 á reiðhjólum. Tvöföldun varð einnig á Geirsnefi, umferðin fór úr 93 hjólum í 187 og aukningin í Elliðaárdal var úr 105 í 172 hjól 27. febrúar.
Á liðnu ári voru settir upp þessir þrír teljarar sem mæla fjölda ferða hjólandi og gangandi á ofantöldum stöðum. Áætlað er að setja upp fleiri víða um borgina og safna gögnum, meðal annars um vaxandi samgönguhjólreiðar.
Hjólreiðar og aðrir vistvænir ferðamátar hafa án vafa góð áhrif á umhverfi, lýðheilsu og lífsgæði og stuðla að betri borg. Niðurstöður talninga eru jákvæðar og í samræmi við stefnu Reykjavíkurborgar um að efla vistvæna ferðamáta en það er meginmarkmið Hjólreiðaáætlunar 2015–2020 að auka hlutdeild hjólreiða í öllum ferðum í borginni.
Hægt er að sjá niðurstöðurnar í borgarvefsjá á vef Reykjavíkurborgar. Teljarar fyrir hjólandi og gangandi eru þar valkostur undir liðnum umferð. Með því að velja „Meira“ takkann og smella á einhvern teljarann þá er hægt að sjá hversu margir gangandi og hjólandi hafa farið þar um. Önnur sveitarfélög á höfuðborgarsvæðinu hafa einnig í hyggju að setja upp teljara á hjólandi og gangandi á helstu stíga í samvinnu við Vegagerðina.
Tengill