Skóla- og frístundastarf mun færast í hefðbundið horf frá og með mánudeginum 4. maí.
Í auglýsingu frá stjórnvöldum, um takmörkun á samkomum vegna farsóttar, segir að frá 4. maí verði hægt að halda óskertri vistun og kennslu í skólum sem og starfsemi dagforeldra, frístundaheimila, félagsmiðstöðva og annarri lögbundinni þjónustu á leik- og grunnskólastigi.
Skóla- og frístundastarf mun því færast í hefðbundið horf frá og með 4. maí. Í ljósi þess að fjarlægðar- og fjöldatakmörk eiga þó enn við um starfsfólk og foreldra auk þess sem áfram þarf að sinna viðbótarverkefnum sem snúa að sóttvörnum, er mikilvægt að undirstrika eftirfarandi;
- Almenn kennsla hefst samkvæmt stundaskrá 4. maí. Þetta á við um allar list- og verkgreinar, íþróttir og sund og bóklega kennslu. Nokkrir grunnskólar munu þó hafa skipulagsdag þennan dag.
- Frá og með 4. maí verður starfsemi frístundaheimila og félagsmiðstöðva hefðbundin.
- Frá og með 4. maí falla úr gildi forgangslistar almannavarna vegna starfa foreldra í framlínuþjónustu og börn þeirra fá sömu þjónustu í skóla- og frístundastarfi og önnur börn.
- Börn sem eru í skilgreindum áhættuhópum vegna Covid-19 haldi sig heima ef ráðleggingar læknis eru á þann veg.
- Hafi börn kvef- eða flensueinkenni eiga þau ekki að koma í skóla- eða frístundastarf.
- Ung börn upp að u.þ.b. 7 ára aldri sem ekki geta skilið eða virt fjarlægðarmörk í samskiptum komi ekki í skóla- og frístundastarf ef einhver á heimili þeirra er í sóttkví.
- Foreldrar koma ekki inn í grunnskóla og frístundaheimili nema nauðsynlegt sé.
- Viðburðir í skóla- og frístundastarfi verða án þátttöku foreldra, s.s. vordagar, skólaslit eða aðrir viðburðir sem hafa verið í hefðbundnu skóla- og frístundastarfi áður með þátttöku foreldra.
- Móttaka fyrir nýja nemendahópa í grunnskóla sem krefst þátttöku foreldra getur ekki farið fram á þessu vori.
- Fundir skóla með einstaka foreldrum eru heimilir í þar til skilgreindum rýmum ef hægt er að fylgja viðmiðum um smitgát.
- Ef brýnar ástæður eru til geta foreldrar sótt um leyfi fyrir börn sín frá skólasókn. Slíkar beiðnir skulu vera skriflegar og þar staðfesta foreldrar að þeir beri fulla ábyrgð á námi nemenda á meðan leyfi varir. Leyfisbeiðnir eru lagðar fram í nemendaverndarráði. Ef leyfi er samþykkt hefur umsjónarkennari samband við nemanda og foreldra 2-3 sinnum í viku til að fylgjast með líðan og framgangi náms.
- Áfram skal gera ráð fyrir viðbótarþrifum og sprittun í skóla- og frístundastarfi.
- Áfram skal gætt hreinlætis í allri umgengni um húsnæði og í samskiptum.
- Fullorðnir skulu halda 2 metra fjarlægð sín á milli eins og aðstæður leyfa og ekki er heimilt að fleiri en 50 fullorðnir komi saman í sama rými.
Leikskólar
· Opnunartími leikskóla verður 7.30 – 16.15 fram eftir maímánuði. Í lok dags verður gengið frá, sótthreinsað og næsti dagur undirbúinn.
· Foreldrar koma áfram aðeins inn í anddyri eða fataklefa í leikskóla og aðeins einn með hverju barni.
· Börn sem eru í skilgreindum áhættuhópum vegna Covid-19 haldi sig heima ef ráðleggingar læknis eru á þann veg.
· Hafi börn kvef- eða flensueinkenni eiga þau ekki að koma í skóla- eða frístundastarf.
· Ung börn þ.e. upp að u.þ.b. 7 ára aldri sem ekki geta skilið eða virt fjarlægðarmörk í samskiptum komi ekki í skóla ef einhver á heimilinu er í sóttkví.
· Viðburðir í skóla- og frístundastarfi verða án þátttöku foreldra s.s. sveitaferðir, útskrift elstu barna og vorhátíðir.
· Fundir skóla með einstaka foreldrum eru heimilir í þar til skilgreindum rýmum ef hægt er að fylgja viðmiðum um smitgát.
· Frá og með 4. maí falla forgangslistar almannavarna vegna starfa foreldra í framlínuþjónustu úr gildi og börn þeirra fá sambærilega þjónustu og önnur börn.
· Aðlögun barna í leikskóla getur hafist á ný í smáum stíl ef aðstæður leyfa en mikilvægt er að sýna sérstaka smitgát.
· Áfram skal gera ráð fyrir viðbótarþrifum og sprittun í skóla- og frístundastarfi.
· Áfram skal gætt hreinlætis í allri umgengni um húsnæði og í samskiptum.
· Áfram skal gætt að smitvörnum varðandi leikefni ungra barna og skipta áfram eftir dögum framboði á leikföngum í leikskólum svo hægt sé að þrífa eða láta bíða í allt að 48 klst áður en aðrir nota.
· Fullorðnir skulu halda 2 metra fjarlægð sín á milli eins og aðstæður leyfa og ekki er heimilt að fleiri en 50 fullorðnir komi saman í sama rými.