Hani, krummi, hundur, svín er yfirskrift sunnudagsins 26. ágúst á Árbæjarsafni og verður sá dagur eins og nafnið ber með sér tileinkaður húsdýrum.
Á Árbæjarsafni búa íslenskar landnámshænur, kindur og lömb, hestar og folald. Að auki verða nokkrir íslenskir fjárhundar í heimsókn í tilefni dagsins. Með reglulegu millibili geta börn einnig skellt sér á hestbak og látið teyma undir sér stuttan hring.
Að vanda verður heitt á könnunni í Dillonshúsi og heimilislegar veitingar í boði.
Dagskráin hefst klukkan eitt og stendur til klukkan fjögur síðdegis.
Ókeypis aðgangur fyrir börn, eldri borgara og öryrkja.
Árbæjarsafn er hluti af Borgarsögusafni: Eitt safn á fimm frábærum stöðum.