Verkefnið Göngum í skólann hófst í dag og er nú haldið í tólfta sinn hér á landi. Átakið var sett í Ártúnsskóla í morgun en það stendur fram til 10. október.
Verkefnið Göngum í skólann er á vegum Íþrótta- og Ólympiusambands Íslands í samstarfi við lögreglu, Samgöngustofu, mennta- og menningarmálaráðuneyti, Slysavarnafélagið Landsbjörg, Embætti landlæknis og Heimili og skóla. Verkefnið hefur vaxið ár frá ári, fyrir tólf árum tóku 26 skólar þátt í því en nú eru þeir 71 um allt land.
Í Ártúnsskóla var mikið um dýrðir í morgun þegar átakið var sett af stað; nemendur sungu fyrir gesti, sem voru fulltrúar allra þeirra sem að átakinu standa, og Sirkus Íslands skemmti gestum. Þá fóru nemendur og starfsfólk skólans í gönguferð í nærumhverfi skólans í Elliðaárdalnum og í framhaldinu tók við íþróttadagur í skólanum, með margvíslegri hreyfingu og skemmtan.
Meginmarkmið verkefnisins Göngum í skólann er að hvetja skólabörn til að tileinka sér virkan ferðamáta og gera þau færari um að ferðast á öruggan hátt í umferðinni. Þá gengur verkefnið út á að fræða þau um ávinning þess að hreyfa sig reglulega, draga úr umferðarþunga, mengun og hraðakstri nálægt skólum.