Frístundamiðstöðin Gufunesbær fagnar tuttugu ára starfsafmæli og af því tilefni var boðið til veislu í Hlöðunni í gær, 8. nóvember.
Gufunesbær var fyrsta frístundamiðstöðin sem stofnuð var í borginni og hefur allt frá stofnun hennar haft aðsetur í Gufunesi. Í upphafi voru aðstæður frekar bágbornar enda öll húsakynni í mikilli niðurníðslu og lítið um gróður og græn svæði.
Nú tuttugu árum síðar hefur afmælisbarnið fengið verulega andlitslyftingu. Gamla hlaðan var gerð upp árið 2008 og hefur hún nýst vel sem fjölnota salur fyrir ýmsa viðburði á vegum frístundamiðstöðvarinnar. Súrheysturninn fékk hlutverk sem klifurturn og hefur mikill fjöldi barna og unglinga spreytt sig þar á veggjaklifri í gegnum tíðina. Gamli bóndabærinn hýsti skrifstofur og útivistarsvæðið í kringum bæinn er nú orðið að frístundagarði. Í garðinum er boðið upp á fjölbreytta útivistarmöguleika fyrir fólk á öllum aldri.
Frá byrjun hefur frístundamiðstöðin gegnt því hlutverki að bjóða íbúum Grafarvogs upp á félags- og tómstundastarf sem hefur forvarnar-, menntunar- og afþreyingargildi. Undir Gufunesbæ heyra átta frístundaheimili og fimm félagsmiðstöðvar. Gufunesbær starfrækir einnig Miðstöð útivistar og útináms (MÚÚ) en sú starfsemi hefur það hlutvert að efla og styrkja fagþekkingu starfsfólks í skóla- og frístundastarfi borgarinnar varðandi útivist, útinám og sjálfbærni. Þá hefur Gufunesbær umsjón með rekstri og starfsemi frístundagarðsins við Gufunesbæ, Hlöðunnar og í samstarfi við ÍTR sér bærinn um rekstur og starfsemi þriggja skíðabrekkna í borginni.
Starfsfólk Gufunesbæjar lítur björtum augum fram á veg og tilbúið að takast á við áskoranir sem frístundamiðstöðin stendur frammi fyrir tengt fagstarfinu og áframhaldandi uppbyggingu á húsnæði og aðstöðu Gufunesbæjar.