Þrátt fyrir vætusamt veður voru um 2000 manns voru viðstödd tendrun Friðarsúlunnar í gærkvöldi. Himinninn skartaði sínu fegursta þegar Friðarsúlan í Viðey var tendruð í gærkvöldi í tólfta skipti.
Að mati verkefnastjóra Tendrunar Friðarsúlunnar Björgu Jónsdóttur gekk allt mjög vel og allir nokkuð glaðir meðað við vætusamt veður. Metfjöldi mætti á viðburðinn í samanburði við síðast liðinn ár eða um 1.772 manns.
Boðið var upp á fríar bátsferðir út í eyjuna og frítt var í strætó. Dagur B. Eggertsson, borgarstjóri flutti ávarp við einstaka friðarstund. Súlan er minnisvarði um John Lennon og er þetta í tólfta skipti sem kveikt er á súlunni á afmælisdegi hans. Friðarsúlan, er í formi óskabrunns en á hana eru grafin orðin „hugsa sér frið“ á 24 tungumálum en enska heitið er vísun í lagið „Imagine“ eftir John Lennon.
Á hverju ári lýsir friðarsúlan frá 9. október (fæðingardegi Lennons) til 8. desember (dánardags hans). Einnig logar ljósið frá vetrarsólstöðum til nýársdags og eina viku að vori. Rafmagnið í súluna er framleitt úr jarðhita og kemur frá Hellisheiðarvirkjun.
Uppsetning friðarsúlunnar er samstarfsverkefni Yoko Ono, Reykjavíkurborgar, Listasafns Reykjavíkur og Orkuveitu Reykjavíkur.
„Ég vona að friðarsúlan muni lýsa upp heitar óskir um heimsfrið hvaðanæva að úr veröldinni og veita hvatningu, innblástur og samstöðu í heimi þar sem nú ríkir ótti og ringulreið. Sameinumst um að gera friðsæla veröld að veruleika.“
– Yoko Ono