Samþykkt byggingaráform í Reykjavík á þessu ári sýna að bygging er nú þegar hafin á mun fleiri íbúðum en allt árið í fyrra.
Samanteknar tölur frá byggingarfulltrúanum í Reykjavík sýna að á fyrstu þremur ársfjórðungum 2020 hefur hafist bygging á 843 nýjum íbúðum í borginni samkvæmt útgefnum byggingarleyfum. Þetta er aukning upp á 35 íbúðir frá því í fyrra en allt árið 2019 voru samþykkt byggingaráform fyrir 808 nýjar íbúðir.
Yfirlit um fjölda nýrra íbúða og byggingarmagn á 3. ársfjórðungi 2020 sýna að bygging er hafin á 815 íbúðum í fjölbýlishúsum, 20 í tvíbýlishúsum og 8 einbýlishúsum.
Tölurnar sýna að uppbygging íbúða í borginni er á fullu skriði og hefur sjaldan verið meiri þrátt fyrir COVID-19.
Frá 2015 – 2019 hafa samþykkt byggingaráform í Reykjavík verið að meðaltali 1000 íbúðir á ári sem er mesta uppbyggingarskeið í sögu borgarinnar.
Framundan er árlegur fundur borgarstjóra þar sem farið verður nákvæmlega yfir íbúðauppbyggingu í borginni.