Brynjar Stefánsson skrifstofustjóri eigna og atvinnuþróunar | Reykjavíkurborg

Brynjar Stefánsson skrifstofustjóri eigna og atvinnuþróunar

föstudagur, 1. júní 2018

Reykjavíkurborg hefur ráðið Brynjar Stefánsson í stöðu skrifstofustjóra yfir skrifstofu eigna og atvinnuþróunar.

  • Brynjar Stefánsson er nýr skrifstofustjóri hjá Reykjavíkurborg og stýrir skrifstofu eigna- og atvinnuþróunar.
    Brynjar Stefánsson er nýr skrifstofustjóri hjá Reykjavíkurborg og stýrir skrifstofu eigna- og atvinnuþróunar.

Brynjar er með B.Sc. gráðu í viðskiptafræði frá Viðskiptaháskólanum á Bifröst og M.Sc. gráðu í rekstrarhagfræði frá Háskólanum í Árósum.

Brynjar starfaði sem forstöðumaður sölu- og viðskiptaþróunar hjá Orku náttúrunnar auk þess sem hann sat í framkvæmdastjórn fyrirtækisins. Hann var jafnframt sviðsstjóri sölu- og markaðssviðs Orkuveitu Reykjavíkur á árunum 2006-2013. Áður starfaði Brynjar sem forstöðumaður sölu- og markaðsmála hjá Maritech. Í ráðningarferlinu kom fram að Brynjar hefur skýra framtíðarsýn á starf skrifstofustjóra eigna og atvinnuþróunar og á hlutverki skrifstofunnar.

Skrifstofa eigna og atvinnuþróunar fer með málefni eignasjóðs Reykjavíkurborgar jafnframt því að vinna að verkefnum á sviði atvinnuþróunar og uppbyggingar atvinnu- og íbúðarhúsnæðis í borginni. Eignasjóður Reykjavíkurborgar er einn stærsti fasteignasjóður landsins með yfir 300 fasteignir. Sjóðurinn fer með rekstur og viðhald eigna borgarinnar og sér um kaup og sölu á löndum, lóðum, fasteignum, samgöngumannvirkjum og lausabúnaði, sem heyrir undir A-hluta í rekstri Reykjavíkurborgar.

Skrifstofa eigna og atvinnuþróunar leiðir einnig vinnu við fjárfestingaáætlun borgarinnar í samvinnu við fjármálaskrifstofu. Þá hefur skrifstofan haldið utan um ýmsar sýningar og kynningarfundi á vegum borgarinnar í því skyni að stuðla að samráði og samvinnu Reykjavíkurborgar og viðskiptalífsins.

Skrifstofa eigna og atvinnuþróunar