Leikskólinn Álftaborg fagnaði fimmtugsafmæli í dag og sóttu margir gestir skólann heim af því tilefni, m.a. Dagur borgarstjóri.
Mikið var um dýrðir í afmælinu og fékk leikskólinn góðar gjafir frá borgarstjóra og foreldrafélaginu. Sýning um sögu skólans var á veggjum leikskólans og myndir úr starfseminni voru sýndar. Þá var boðið upp á góðar veitingar í afmælinu. Öll börnin skörtuðu svo kórónu, enda eiga allir afmæli þegar leikskólinn á afmæli.
Álftaborg tók til starfa 12. janúar 1968 og var reksturinn fyrst um sinn á vegum Barnavinafélagsins Sumargjafar. Leikskólinn starfar nú í húsnæði sem tekið var í notkun seint á árinu 2007. Þá er fallegur garður við leikskólann sem hannaður var af Landmótun.
Leikskólastjóri í Álftaborg er Anna Hjördís Ágústsdóttir.
Til hamingju Álftaborg með hálfrar aldar afmælið !