Áfangaheimili fyrir konur opnar í miðborginni

Við opnun áfangaheimilisins í dag. Frá vinstri Dagur B. Eggertsson, borgarstjóri, Guðrún Þorgerður Ágústsdóttir, forstöðukona áfangaheimilisins, Regína Ásvaldsdóttir, sviðsstjóri velferðarsviðs og Heiða Björg Hilmisdóttir, formaður velferðarráðs.
Við opnun áfangaheimilisins í dag. Frá vinstri  Dagur B. Eggertsson, borgarstjóri, Guðrún Þorgerður Ágústsdóttir, forstöðukona áfangaheimilisins, Regína Ásvaldsdóttir, sviðsstjóri velferðarsviðs og Heiða Björg Hilmisdóttir, formaður velferðarráðs.

Fyrsta áfangaheimili á vegum Reykjavíkurborgar fyrir konur var opnað formlega í dag og er það til húsa að Njálsgötu í Reykjavík. Í húsinu eru þrettán einstaklingsíbúðir, ein starfsmannaíbúð og sameiginlegt rými.

Áfangaheimili er tímabundið húsnæði til að leysa bráðan húsnæðisvanda þeirra sem hafa átt við áfengis- og annan vímuefnavanda að stríða og eru í virkri endurhæfingu eftir meðferð.

Uppbygging þjónustu við heimilislausa í Reykjavík hefur á undanförnum árum verið frekar sniðin að þörfum karla en kvenna, líkt og fram kemur í stefnu Reykjavíkurborgar um málefni heimilislausra með miklar og flóknar þjónustuþarfir.

,,Opnun áfangaheimilisins er mikilvægur liður í því að bæta þjónustu við heimilislausar konur í Reykjavík. Þeim boðið skjól og öryggi þar sem þeim er mætt á þeirra forsendum,” segir Dagur B. Eggertsson borgarstjóri

Markmiðið er að bjóða einstaklingum sem hætt hafa neyslu öruggt heimili, stuðning og aðhald meðan þeir aðlagast samfélaginu á nýjan leik. Á áfangaheimilinu verður unnið eftir áfallamiðaðri hugmyndafræði með náinni samvinnu við Miðstöðvar velferðarsviðs og viðkomandi meðferðaraðila.  

Forstöðukona  áfangaheimilisins er Guðrún Þorgerður Ágústsdóttir, félagsráðgjafi sem hefur margra ára reynslu í vinnu með einstaklingum sem hafa glímt við áfengis og vímuefnavanda. Guðrún er jafnframt forstöðumaður yfir áfangaheimilinu Brautinni sem er fyrir karla sem lokið hafa áfengis- og vímuefnameðferð.

Áætlað er að kostnaður vegna reksturs áfangaheimilisins verði allt að 25 milljónir króna á ári og að þar verði forstöðumaður í dagvinnu og félagsráðgjafi í hálfu starfi. 

Í dag eru níu áfangaheimili í Reykjavík, ýmist rekin af félagasamtökum eða Reykjavíkurborg, þar sem rými er fyrir um það bil 200 einstaklinga. Njálsgatan og Brautin eru rekin af Virknihúsi en reynslan af Brautinni sýnir að afar mikilvægt sé að tryggja að til staðar séu einstaklingsáætlanir um virkni og bata, samhliða því að tryggja öruggt húsnæði.