Úthlutun styrkja menningar, íþrótta- og tómstundaráðs og útnefning Listhóps Reykjavíkur 2019 fór fram í Iðnó í dag. Pawel Bartoszek formaður ráðsins gerði grein fyrir úthlutuninni og öðru framlagi borgarinnar til menningarmála.
Líkt og áður var faghópi skipuðum fulltrúum Bandalags íslenskra listamanna og Hönnunarmiðstöðvar Íslands falið að fara yfir styrkumsóknir og leggja til styrki til menningar og lista. Alls var 161 umsókn til meðferðar þar sem sótt var um samtals 209.030.750 kr. Menningar-, íþrótta- og tómstundaráð hafði 60.888.000 kr. til úthlutunar til styrkja á sviði menningarmála árið 2019 og veitti vilyrði fyrir 75 styrkjum og samstarfssamningum fyrir þá upphæð. En fyrir eru 23 hópar með eldri samninga í gildi.
Helstu nýmæli í styrkveitingum ársins eru þau að Reykjavíkurborg hefur í fyrsta sinn gert samstarfssamning við Myndhöggvarafélag Reykjavíkur. Mikil gróska er í félaginu og undanfarin ár hefur hlutur ungs fólks aukist sem og hlutur kvenna. Félagsmenn telja á um þriðja hundrað og hefur verið virkt í sýningarhaldi bæði innan dyra sem utan, í Reykjavík og úti á landi m.a. með sýningunum List um landið, Strandlengjan I og II, Firma ´99 og nú síðast Hjólið – Fallvelti heimsins, sem var fyrsti hluti af fimm sýninga röð sem Myndhöggvarafélagið stendur fyrir í aðdraganda fimmtíu ára afmælis félagsins árið 2022. Sú næsta Hjólið II – Úthverfi verður haldin í Breiðholti og Árbæ sumarið 2019.
Myndhöggvarafélagið í Reykjavík var formlega stofnað árið 1972 en á rætur sínar í svonefndum Útisýningum á Skólavörðuholti á sjöunda áratugnum. Helstu hvatamenn voru Ragnar Kjartansson og Jón Gunnar Árnason. Síðan þá hefur félagið unnið ötullega að því að myndlistarmenn hafi aðgang að verkstæðum með viðeigandi tækjakosti og vinnustofum til að sinna listsköpun auk þess að skipuleggja sýningar og gefa út ritað efni. Myndhöggvarafélagið og Reykjavíkurborg gera samstarfssamning til tveggja ára um 2 milljónir á ári. Myndhöggvarafélagið er þar að auki útnefnt Listhópur Reykjavíkur árið 2019.
Af öðrum samstarfssamningum er gaman að nefna að gerður er nýr tveggja ára samningur við Reykjavik Dance Festival og er framlagið hækkað úr þrem milljónum í fjórar á ári. Hér á landi er vaxandi hópur af vel menntuðum dönsurum og danshöfundum en tækifærin til að sýna hvað í þeim býr eru fá hérlendis. Því er mikilvægt að styðja við bakið á Reykjavík Dance Festival sem er flaggskip íslensks nútímadans og veitir danslistafólki kærkomið tækifæri til að stíga á stokk.
Samstarfssamningurinn við Múlann jazzklúbb var sömuleiðis framlengdur til tveggja ára og framlagið hækkað úr milljón í eina og hálfa árlega. Múlinn hefur undanfarna áratugi vaxið sem ómissandi vettvangur fjölbreyttrar ryþmískrar tónlistar í síbreytilegu tónleikaumhverfi Reykjavíkur og ánægjulegt að styðja við það mikilvæga starf sem þar fer fram.
Þá hafa verið endurnýjaðir samningar til tveggja ára við Harbinger sýningarrými og ASSITEJ Íslandsdeild alþjóðasamtaka um barnaleikhús.
Hæsta árlega styrkinn hlutu Lókal leiklistarhátíð með þriggja milljón króna styrk, Pera Óperukollektív og Sýningin Hjólið II sem Myndhöggvarafélag Reykjavíkur framkvæmir með tveggja milljón króna styrk og félagið Íslensk grafík með eina og hálfa milljón. Aðrir styrkir nema hæst 1 milljón króna en lægst 158 þúsund krónum.
Hæstu framlög til menningarlífsins í borginni fyrir utan rekstur menningarstofnana hennar, Borgarbóksafns, Borgarsögusafns og Listasafns Reykjavíkur, fara til Leikfélags Reykjavíkur í Borgarleikhúsi, Sinfóníuhljómsveitar Íslands og Tónlistar- og ráðstefnuhússins Hörpu. Jafnframt njóta Listahátíð í Reykjavík, Sviðslistamiðstöð í Tjarnarbíói, Sjónlistamiðstöð á Korpúlfsstöðum, Bíó Paradís, og Hönnunarmiðstöð og fleiri sjálfstæðir aðilar húsnæðis- og/eða rekstrarstyrkja.
Heildaryfirlit
STYRKVEITINGAR MENNINGAR-, ÍÞRÓTTA- OG TÓMSTUNDARÁÐS ÁRIÐ 2019
Gerðir verði samstarfssamningar vegna áranna 2019 og 2020 við eftirtalda aðila með árlegu framlagi með fyrirvara um samþykki borgarráðs og heimildir í fjárhagsáætlun 2020:
4 m.kr. Reykjavík Dance Festival
2 m.kr. Myndhöggvarafélag Reykjavíkur – Listhópur Reykjavíkur 2019
2 m.kr. ASSITEJ Íslandsdeild alþjóðasamtaka um barnaleikhús
1,5 m kr. Múlinn jazzklúbbur
1 m.kr. Harbinger sýningarrými fyrir myndlist
Styrkir til verkefna árið 2019:
3 m.kr. Lókal leiklistarhátíð
2 m.kr. Myndhöggvarafélagið í Reykjavík – Sýningin Hjólið II
2 m.kr. Pera Óperukollektíf
1,5 m.kr. Íslensk grafík
1 m.kr. Lúðrasveit Reykjavíkur
1 m.kr. Lúðrasveit verkalýðsins
1 m.kr. Ramkram ljósmyndagallerí
1 m.kr. SÍM – Listamessa í Reykjavík
1 m kr. SÍM – Mánuður myndlistar
1 m kr. Félag um ljósmyndahátíð Íslands
1 m kr. Africa-lole Far fest Africa
1 m kr. Kvennakórinn Vox Feminae
1 m kr. Íslandsdeild IBBY
1 m kr. Evrópusamband píanókennara
1 m kr. Steinunn Þórarinsdóttir
1 m kr. Design Talks
1 m kr. 20 ára afmæli Hinsegin daga
800.000 kr. Sigríður Heimisdóttir, Glerlíkaminn
800.000 kr. Freyja Eilíf Helgudóttir – Ekkisens sýningarrými
800.000 kr. Alþjóðlega tónlistarakademían
750.000 kr. Sigurbjartur Sturla Atlason – Haha
750.000 kr. Sinfóníuhljómsveit áhugamanna
750.000 kr. Sinfóníuhljómsveit unga fólksins
700.000 kr. Reykjavík Folk Festival
700.000 kr. Kátt á Klambra
700.000 kr. Alþýðuóperan
600.000 kr. Guðný Guðmundsdóttir - hádegistónleikar
600.000 kr. Freyjujazz
500.000 kr. Tónskóli Sigursveins D. Kristinssonar
500.000 kr. Hala leikhópurinn
500.000 kr. Handverk og hönnun
500.000 kr. Camerarctica
500.000 kr. Klassíski listdansskólinn - Mjóddamamma
500.000 kr. Kjartan Ólafsson - Eriktíð
500.000 kr. Börnin tækla tónskáldin
500.000 kr. Árstíðirnar – tónlistarævintýri fyrir börn
500.000 kr. Leikfélagið Hugleikur
500.000 kr. Andrými – Íslenski flautukórinn
500.000 kr. Ástbjörg Rut Jónsdóttir - Golden Age
500.000 kr. Þórunn Lárusdóttir – Konukot
500.000 kr. Tinna Hrafnsdóttir – Marinetti
500.000 kr. Hið nýja samfélag og Hannes Hafstein
500.000 kr. Jóhann Lúðvík Torfason - Húsin við Laugaveg
500.000 kr. Vignir Rafn Valþórsson - Góða fólkið
500.000 kr. Ragnheiður Ásgeirsdóttir - Leiklestur í París
500.000 kr. Halldór Ásgeirsson - Myndfánar
500.000 kr. Sigrún Guðmundsdóttir – textíl söfnun
500.000 kr. Bergljót Arnalds – Perlurnar okkar
500.000 kr. Ragna Fróðadóttir - Textílráðstefna
500.000 kr. The last kvöldmáltíð - sviðsverk
500.000 kr. Olga Sonja Thorarensen - SJÁLFIN
500.000 kr. Birgir Örn Thoroddsen - Sýnishorn
500.000 kr. Bergþóra Linda Ægisdóttir - Sónata
430.000 kr. Iceland Writers Retreat
400.000 kr. Elfa Lilja Gísladóttir - Upptakturinn
400.000 kr. Finnur Arnar Arnarsson - Bókin um skúrinn
400.000 kr. Ragnhildur Ásvaldsdóttir – Í skjóli fyrir vindum
400.000 kr. Unnur Elísabet Gunnarsdóttir – Ég býð mig fram
400.000 kr. Íris Ösp Sveinbjörnsdóttir – Grafískar konur
400.000 kr. Gerður Sif Ingvarsdóttir – Reykjavik Metal Fest 2019
400.000 kr. Hringleikur sirkuslistafélag
400.000 kr. Listvinafélag Hallgrímskirkju
300.000 kr. Wioleta Anna Ujazdowska - Hidden people
300.000 kr. Ragnheiður Árnadóttir - Rödd og raf
300.000 kr. Jón Helgi Þórisson - Landnámsmenning
300.000 kr. Hallveig Rúnarsdóttir - Jóhannesarpassía
300.000 kr. Margrét Vilborg Tryggvadóttir - Reykjavík barnanna
300.000 kr. Kári Kárason Þormar - Brilliant Barrokk
300.000 kr. Les Fréres Stefson - Snælda
300.000 kr. Brynja Pétursdóttir - Street dans einvígið
300.000 kr. Brassband Reykjavíkur
250.000 kr. Emilía Rós Sigfúsdóttir - Elektra Ensemble
200.000 kr. Ragnheiður Árnadóttir - Mógil tónleikar
158.000 kr. Lilja María Ásmundsdóttir - Tónleikar á Myrkum músíkdögum