25 ára afmæli Fjölskyldu og húsdýragarðsins | Reykjavíkurborg

25 ára afmæli Fjölskyldu og húsdýragarðsins

föstudagur, 3. ágúst 2018

Fjölskyldu- og húsdýragarðurinn í Laugardal fagnar 25 ára afmæli með opnun nýs fallturns og stórtónleikum Stuðmanna, Sölku Sólar og JóaPé og Króla um helgina.

  • Frá Fjölskyldu- og húsdýragarðinum sem Reykjavíkurborg rekur í Laugardal.
    Frá Fjölskyldu- og húsdýragarðinum sem Reykjavíkurborg rekur í Laugardal. Þar verður líf og fjör um helgina enda fagnar garðurinn 25 ára afmæli um þessar mundir en hann var opnaður 1993.
  • Frá Fjölskyldu- og húsdýragarðinum í Laugardal.
    Það er ýmislegt að sjá og gera í Fjölskyldu- og húsdýragarðinum. Þar er m.a. þetta myndarlega víkingaskip.
  • Frá Fjölskyldu- og húsdýragarðinum sem Reykjavíkurborg rekur í Laugardal.
    Frá Fjölskyldu- og húsdýragarðinum sem Reykjavíkurborg rekur í Laugardal.

Nýr fallturn í Fjölskyldugarðinum verður opnaður formlega á laugardaginn 4. ágúst kl 11 að viðstöddum borgarstjóra. Nýi turninn er ríflega 20 metrar á hæð og kemur í stað eldri turns sem var 15 metra hár. Það segir þó ekki alla söguna því fall og færsla sæta í þeim nýja er 16,5 metrar en var einungis 12 metrar í þeim gamla. Þetta er raunar þriðji fallturninn í sögu garðsins.

Nýi turninn tekur 12 farþega en sá gamli tók 10. Rúsínan í pylsuendanum er að nýi turninn snýst í hringi og því fá farþegar að njóta 360 gráða útsýnis í ferðum sínum – í rólegheitum á uppleið, en talsvert hraðar á niðurleið en þá kynnast farþegar hröðun upp á 2,5 g.

Loks er fallturninn búinn ríflega 3000 forritanlegum LED RGB ljósum sem eru glæsileg að sjá jafnvel í dagsbirtu.

Í tilefni af 25 ára afmælinu verða haldnir stórtónleikar í garðinum á laugardaginn. Þá munu Stuðmenn, Salka Sól og JóiP og Króli stíga á stokk í Fjölskyldugarðinum. Tónleikarnir hefjast kl. 15 og standa til kl. 17. Hefðbundinn aðgangseyrir verður í garðinn og árskort gilda.

Gestir eru hvattir til að mæta tímanlega til að forðast biðraðir enda er  ágæt veðurspá fyrir laugardaginn.

Fjölskyldu- og húsdýragarðurinn er opinn alla helgina frá 10 – 18.