Byggingarteikningar

""

Alla aðaluppdrætti af húsum má nálgast á teikningavef Reykjavíkurborgar.  Hjá þjónustuveri Reykjavíkurborgar í Borgartúni 12–14 eru teikningar fáanlegar í fullri stærð.

Séruppdrættir

Séruppdrættir, svo sem lagna- og burðarþolsteikningar hafa hingað til ekki verið aðgengilegir á vefnum en nú er hafin vinna við að skanna þá inn. Þeir eru þegar farnir að birtast á vefnum og mun þeim fjölga hægt en örugglega næstu mánuði en áætlað er að ljúka þessari vinnu um mitt ár 2024.

Í þjónustuveri, Borgartúni 12-14, er hægt að nálgast teikningar sem ekki eru aðgengilegar á vefnum. Best er að senda beiðni um teikningar á teikningar@reykjavik.is þar sem það eru ekki allar teikningar í húsi meðan á skönnunarverkefni stendur.

Gögn í vörslu byggingarfulltrúa

Öll gögn í vörslu embættis byggingarfulltrúa Reykjavíkur, sem hlotið hafa formlega afgreiðslu, eru opinber skjöl og aðgengileg almenningi. Þar á meðal eru teikningar af mannvirkjum innan borgarinnar.

Samkvæmt upplýsingalögum er heimilt að takmarka aðgang almennings að gögnum þegar mikilvægir almannahagsmunir krefjist, enda hafi þau að geyma upplýsingar um öryggi ríkisins eða varnarmál. Almenningi er því ekki veittur aðgangur að teikningum þess eðlis. 

Hvar finn ég teikningar af húsum í Reykjavík?

Til að fá aðalteikningar af húsum er farið beint inn á teikningavef byggingarfulltrúa. Þar er slegið inn heimilisfang og húsnúmer og viðeigandi teikningar valdar.

Athugið að heimilisfang getur innihaldið fleiri en eitt númer, til dæmis í fjölbýlishúsi eða raðhúsi, þá þarf að slá inn frá  - til (til dæmis Borgartún 8 - 16). Einnig er hægt að fara í ítarleit og slá inn aðrar og/eða fleiri breytur, til dæmis landnúmer eða lýsingu.

Útprentun og skönnun teikninga

Þær teikningar sem ekki eru á teikningavef er hægt að fá sendar til sín rafrænt með því að senda beiðni á teikningar@reykjavik.is.

Hægt er að fá teikningar útprentaðar í fullri stærð í þjónustuveri, Borgartúni 12-14. Best er að senda beiðni á teikningar@reykjavik.is. Staðfesting er send í tölvupósti þegar teikningarnar eru tilbúnar til afhendingar.

Leitast er við að afgreiða allar beiðnir innan næsta virka dags og upplýst í tölvupósti ef tafir eru á því. 

Rukkað er samkvæmt gjaldskrá þjónustuvers.