Hverfið mitt
Kosningu í Hverfið mitt er lokið og voru niðurstöður birtar föstudaginn 29. september. Kosningin var rafræn og stóð yfir frá 14. til 28. september 2023.
Um verkefnið
Um er að ræða verkefni íbúa og stjórnsýslu borgarinnar. Verkefnið snýst í grunninn um forgangsröðun fjármuna til verkefna. Hvert hverfi fær fasta upphæð sem skiptist jafnt á milli hverfa ásamt viðbótarupphæð sem er ákveðin út frá fjölda íbúa í hverju hverfi.
Hvernig er ferlið?
Ferli verkefnisins skiptist í hugmyndasöfnun, yfirferð hugmynda, rafræna kosningu og framkvæmd verkefna. Markmiðið er að virkja almenning til þátttöku í lýðræðislegri umræðu og ákvarðanatöku.
Hugmyndasöfnun
Óskað eftir hugmyndum frá borgarbúum að verkefnum sem verður kosið um í hverfakosningum Hverfið mitt. Hugmyndasöfnun stendur yfir í nokkrar vikur og er auglýst vel á miðlum Reykjavíkurborgar.
Það er ýmislegt sem þú getur gert til að auka líkurnar á að þín hugmynd komist áfram í kosninguna. Bestu hugmyndirnar snúast um eitthvað sem gerir borgina betri og skapar eitthvað nýtt í hverfinu. Hér er ekki verið að leita að ábendingum um hvernig ætti að laga eitthvað sem er gamalt.
Yfirferð hugmynda
Að lokinni hugmyndasöfnun er komið að yfirferð hugmynda. Nefnd starfsfólks hjá borginni fer þá yfir allar hugmyndir og metur hvort þær uppfylli reglur verkefnisins. Af þeim hugmyndum fara 15 vinsælustu hugmyndirnar í hverju hverfi sjálfkrafa áfram. Íbúaráð hverfisins velur svo 10 hugmyndir til viðbótar.
Við mat á hugmyndum leitar starfsfólk verkefnisins allra leiða til þess að útfæra hugmyndir svo þær falli að reglum verkefnisins og kjósa megi um þær í kosningunum. Í sumum tilfellum er haft samband við hugmyndahöfunda til þess að skýra betur eða breyta hugmynd svo hún uppfylli reglur verkefnisins.
Rafræn hverfakosning
Kosið er á milli 25 hugmynda í hverju hverfi. Kosningin fer fram á vefsvæði þar sem notandi auðkennir sig með öruggum hætti (með Íslykli eða rafrænum skilríkjum). Þátttaka er opin öllum sem verða 15 ára árið sem kosið er og hafa lögheimili í Reykjavík.
Framkvæmd verkefna
Eftir kosningarnar fer fram ferli hönnunar og útboðs, ásamt samráði við nærsamfélagið áður en hugmyndirnar sem voru kosnar eru framkvæmdar.
Leitast er við að hafa samráð við hugmyndasmiði og íbúaráð um framkvæmd verkefna, sérstaklega í þeim tilvikum þar sem breyta þarf hugmyndum eða staðsetningum þeirra. Einnig er hugmyndahöfundum boðið á samráðsfund með verkefnastjórn Hverfið mitt þar sem þeir geta útskýrt hugmynd sína nánar.
Hafa samband
Frekari upplýsingar um Hverfið mitt má fá hjá eftirtöldum aðilum:
- Netfang: hverfidmitt@reykjavik.is
- Verkefnisstjóri: Guðný Bára Jónsdóttir
- Þjónustumiðstöðvar hverfa veita einnig nánari upplýsingar