Skóla- og frístundaráð skorar á mennta- og menningarmálaráðherra að kveða skýrt á um að einkunnir úr samræmdum prófum í 9. bekk skuli ekki nýttar í þeim tilgangi að velja nemendur inn í framhaldsskóla.
Samræmd próf í grunnskólum voru til umfjöllunar á fundi skóla- og frístundaráðs í dag og komu fulltrúar mennta- og menningarmálaráðuneytis og Menntamálastofnunar á fundinn til að svara spurningum fulltrúa ráðsins. Fulltrúar Samfylkingar, Bjartrar framtíðar, Vinstri grænna og áheyrnarfulltrúi Pírata samþykktu eftirfarandi bókun á fundinum;
"Meirihlutinn gagnrýnir harðlega að niðurstöður samræmdra prófa í 9. bekk grunnskóla geti ráðið úrslitum um inntöku nemenda í tiltekna framhaldsskóla. Það gengur gegn yfirlýstum tilgangi samræmdu prófanna sem er að veita nemendum og kennurum þeirra leiðsagnarmat til að stuðla að framförum nemenda í efstu bekkjum grunnskólans og grefur undan námsmatskerfi grunnskólanna sjálfra. Þá vekur furðu ákvörðun um að prófa ekki ritun sem stangast á við ráðleggingar fagráðs um náms- og gæðamat Menntamálastofnunar. Skorað er á mennta- og menningarmálaráðherra að kveða skýrt á um að einkunnir úr samræmdum prófum í 9. bekk skuli ekki nýttar í þeim tilgangi að velja nemendur inn í framhaldsskóla."
Áheyrnarfulltrúi foreldra og áheyrnarfulltrúi grunnskólakennara lögðu einnig fram bókanir á fundinum þar sem lýst er yfir þungum áhyggjum af þeim breytingum sem gerðar voru í desember 2016 á reglugerð um innritun í framhaldsskóla og heimilar skólum að taka mið af ýmsum viðbótargögnum við innritun, s.s. samræmdra prófa.