Veist þú um hús eða lóðir sem verðskulda viðurkenningu?

mánudagur, 20. mars 2017

Á afmæli Reykjavíkurborgar 18. ágúst, eða sem næst þeim degi  á ári hverju, eru veittar viðurkenningar fyrir endurbætur á eldri húsum og snyrtilegar þjónustu-, stofnana- og fjölbýlishúsalóðir. Í ár verður í fyrsta sinn leitað eftir hugmyndum frá íbúum og hverfisráðum við val á húsum og lóðum sem þykja verðskulda að fá Fegrunarviðurkenningu Reykjavíkurborgar.

  • Reykjavík
    Reykjavík

Veittar eru viðurkenningar fyrir endurbætur á 1 – 3 eldri húsum frá ýmsum tímum og fyrir 4 – 5 lóðir þjónustu-, stofnana- og fjölbýlishúsa. Auk þess hafa á undanförnum árum verið veittar viðurkenningar fyrir vel útfærð svæði fyrir utan verslanir við „sumargötur“, þ.e. götur, sem eru göngugötur á sumrin.

Viðurkenningarnar eru svo afhentar við hátíðlega athöfn í Höfða í tengslum við afmæli Reykjavíkurborgar sem er 18. ágúst á ári hverju. Ekki er um að ræða verðlaun í formi fjármagns, heldur er eingöngu verið að veita viðurkenningu og hrósa viðkomandi eigendum/ lóðarhafa fyrir þeirra framlag til að bæta útlit og borgarmynd viðkomandi lóða og bygginga.
Í ár verður sú breyting gerð á að nú fá íbúar og hverfisráð tækifæri til að koma með hugmyndir að húsum og lóðum sem þykja verðskulda að fá Fegrunarviðurkenningu Reykjavíkurborgar.


Óskað er eftir hugmyndum fyrir 15.apríl 2017 og skal senda hugmyndir á skipulag@reykjavik.is eða á tölvupósti til neðangreindra verkefnisstjóra, merkt fegrunarviðurkenningar 2017.


Vinnuhópur sem skipaður er fulltrúum frá umhverfis- og skipulagssviði og Borgarsögusafni velja svo úr innsendum tillögum þau hús og lóðir sem fá viðurkenningu. Vinnuhópinn fyrir árið 2017 skipa eftirtaldir aðilar:
Fyrir endurbætur á eldri húsum:

Margrét Þormar, arkitekt 

María Gísladóttir, arkitekt 

Fyrir fallegar og vel skipulagðar lóðir:
Björn Ingi Edvardsson, landslagsarkitekt

Edda Ívarsdóttir, borgarhönnuður 

Hægt að skoða eldri viðurkenningar og fyrirkomulag:  www.reykjavik.is/fegrunarvidurkenningar