Sverrir Heiðar Davíðsson, 21 árs gamall nemi í hugbúnaðarverkfræði, fékk úthlutað leiguíbúð í Lönguhlíð, þjónustuíbúðum fyrir aldraða.
Velferðarráð Reykjavíkurborgar samþykkti fyrir nokkru tilraunaverkefni um að bjóða háskólanemum að leigja tvær íbúðir í þjónustukjörnum fyrir aldraða. Framlag nemanna mun fyrst og fremst verða af félagslegum toga, fela í sér gott samneyti við íbúa og stuðla að aukinni færni þeirra í fjölbreyttum þáttum á borð við notkun samfélagsmiðla og snjalltækja eða listsköpun.
Tuttugu umsækjendur uppfylltu skilyrði til að leigja íbúðirnar og var Sverrir Heiðar valinn úr þeirra hópi. Regína Ásvaldsdóttir, sviðsstjóri velferðarsviðs, afhenti honum lyklana í Lönguhlíð í gær.
Annar háskólanemi fær svo afhenta lykla að íbúð í þjónustukjarnanum Norðurbrún 1 innan tíðar.