Haft verður náið samstarf við foreldra og starfsfólk um sameininguna og verður skipaður starfshópur skipaður fulltrúum beggja leikskóla sem gera mun áætlun um hvernig að henni verði staðið.
Í greinargerð með tillögunni segir að með sameiningu leikskólanna verði til tvær heildstæðar skólastofnanir í Víkur- og Staðahverfi með einn sameinaðan leikskóla og einn sameinaðan grunnskóla. Nú þegar sækja unglingar sem búsettir eru í Staðahverfi, nám sitt í Kelduskóla/Vík og tengsl hverfanna mætti efla enn frekar með þessari skólasameiningu.
Börnum hefur á undanförnum árum fækkað til muna í leikskólanum Bakka og telst hann því ekki hagkvæm rekstrarleg eining. Leikskólinn er ekki fullnýttur en hann rúmar 69 börn. Um 50 börn á leikskólaaldri eru búsett í Staðarhverfi. Bakki var áður rekinn með leikskólanum Bergi á Kjalarnesi undir heitinu Bakkaberg. Leikskólinn Berg var í vor sameinaður með grunnskóla og tónlistarskólanum á Kjalarnesi
Leikskólinn Hamrar rúmar 88 börn auk 16 barna í lausri stofu. Samtals mun nýr sameinaður leikskóli í Víkur- og Staðahverfi því rúma á bilinu 157 – 173 börn.
Akstursleið á milli starfseininga sameinaðs leikskóla er 1,7 km og stysta gönguleið um 1,8 km.
Samþykkt skóla- og frístundaráðs mun fara fyrir borgarráð til endanlegrar afgreiðslu.