Borgarstjóri og rektor Háskóla Íslands undirrituðu í dag samning um lóðir háskólans. Samningurinn tekur til um 400 þúsund fermetra landsvæðis og markar ákveðin tímamót í samskiptum Reykjavíkurborgar og háskólans. Tekin eru af öll tvímæli um afmörkun eignarlóðar háskólans, sem og hvaða lóðir falla undir lóðarleigu en þar eru lóðir fyrir kennsluhúsnæði nú undanskildar. Vatnsverndarsvæði í Vatnsmýri færist á ný til borgarinnar og staðfest er vilyrði til háskólans um uppbyggingu á Fluggarðasvæði. Vísindagarðareitur nýtur sérstöðu í samningnum að því leyti að þar er háskólanum heimilt að framselja lóðarréttindi til eflingar vísinda- og atvinnustarfsemi.
Lóðir fyrir Háskóla Íslands hafa verið til umfjöllunar hjá borgaryfirvöldum allt frá árinu 1930 og hafa allmörg vilyrði verið veitt og úthlutanir samþykktar fyrir háskólann og tengdar stofnanir. Í samþykktum bæjarstjórnar og síðar borgarstjórnar er talsvert mismunandi hversu formlega hefur verið gengið frá úthlutun lóða. Með hinum nýja heildarsamningi um lóðir er afmörkun landspildna og lóðamörk skýrð og nýting lóða. Vinnuhópur Reykjavíkurborgar, Háskóla Íslands, fjármála- og efnahagsráðuneytis og mennta- og menningarmálaráðuneytis hefur um skeið unnið að gerð þessa umfangsmikla samnings. Unnið var út frá almennu sjónarmiði ríkisins um skráningu ríkiseigna að ríkissjóður Íslands sé skráður rétthafi en Háskóli Íslands umráðaaðili og afnotahafi flestra umræddra lóða og mannvirkja.
„Háskólasvæðið er mikilvægur hluti miðborgar Reykjavíkur og fagnaðarefni að búið sé að staðfesta þann ramma sem um lóðir Háskóla Íslands gilda. Fyrir utan húsnæði fyrir Heilbrigðisvísindasvið, sem verður á spítalalóðinni, stefnir skólinn að því að færa alla starfsemi sína á umrætt svæði. Með því skapast aukin sóknarfæri hvað samvinnu á milli fræðigreina varðar og samlegð í nýtingu húsnæðis og aðstöðu. Vilyrðið um að háskólinn geti þróað starfsemi sína til austurs á Fluggarðasvæðinu skapar fjölbreytt tækifæri fyrir framtíðaruppbyggingu skólans,“ segir Kristín Ingólfsdóttir, rektor Háskóla Íslands.
Samræmi í lóðarleigu
Samningurinn leysir úr misræmi sem verið hefur á af hvaða lóðum lóðarleiga skuli greidd, en hún verður frá gildistöku samnings ekki innheimt af kennsluhúsnæði og leiðir það til sex milljóna króna lækkunar á lóðarleigutekjum hjá Reykjavíkurborg. Þetta er m.a. gert til samræmis við samkomulag við Háskólann í Reykjavík á lóð hans við Öskjuhlíð. Ekki er greidd lóðarleiga af eignarlóð Háskóla Íslands, en fyrir lóðir undir stúdentagarða er greidd lóðarleiga eins og af íbúðarhúsalóðum í Reykjavík á hverjum tíma.
400 þúsund fermetrar
Landið sem samningurinn tekur til er um 400 þúsund fermetrar og er því skipt í níu reiti:
Skoða yfirlitsmynd af svæðinu.
-
Aðalbyggingarreitur, sem er eignarlóð Háskólans, afmarkast af Suðurgötu að vestan, Hringbraut að norðan, Sæmundargötu að austan og Sturlugötu að sunnan. Reiturinn er um 77.009 fermetrar að stærð og er eignarlandið stækkað nokkuð frá því sem samþykkt var 1936. Á þessum reit eru margar elstu byggingar háskólans og Þjóðminjasafn Íslands.
-
Vatnsmýrarreitur afmarkast af Sæmundargötu að vestan, Hringbraut að norðan, vatnsverndarsvæði Vatnsmýrar og Njarðargötu að austan og Sturlugötu að sunnan. Reiturinn er um 54.715 fermetrar að stærð og á honum standa Askja og Norræna húsið.
Háskólinn hafði fengið vilyrði fyrir vatnsverndarsvæðinu, en það færist nú formlega til borgarinnar og verður utan lóðar háskólans.
-
Prófessorabústaðareitur afmarkast af Suðurgötu að vestan, Sturlugötu að norðan, Oddagötu að austan og Eggertsgötu að sunnan. Reiturinn er um 17.994 fermetrar að stærð og er skipt upp í margar lóðir. Reykjavíkurborg hefur gefið út lóðarleigusamning fyrir hverja lóð.
-
Lóð stúdentagarða við Eggertsgötu afmarkast af Suðurgötu að vestan, Eggertsgötu að norðan, göngustígs milli Eggertsgötu og Skerplugötu að austan og lóðamörkum Þorragötu 5-9 og Reykjavíkurvegar 33, 35, 48 og 50 að sunnan. Lóðin er um 52.318 fermetrar að stærð og þar eru risin húsin Eggertsgata 2-34 og Suðurgata 121. Þegar hafa verið byggðir stúdentagarðar á lóðinni. Reiturinn er skilgreindur sem ein leigulóð og telst fullbyggður.
-
Lóð stúdentagarða að Sæmundargötu 14, 16, 18 og 20 afmarkast af Oddagötu að vestan, Sturlugötu að norðan, Sæmundargötu að austan og Eggertsgötu að sunnan. Lóðin er10.577 fermetrar og hefur lóðarleigusamningur við Félagsstofnun stúdenta verið gefinn út og honum þinglýst.
-
Vísindagarðareitur afmarkast af Sæmundargötu að vestan, Sturlugötu að norðan, lóðamörkum Sturlugötu 8 og hverfisstöð borgarinnar að austan og væntanlegri framlengingu á Eggertsgötu að sunnan. Reiturinn er samtals um 49.685 fermetrar að stærð. Reitnum er skipt upp í sex lóðir og verður einni þeirra úthlutað til Orkuveitu Reykjavíkur fyrir spennistöð.
Háskóla Íslands er heimilt að framselja lóðirnar Vísindagörðum Háskóla Íslands ehf. og hefur einni lóð verið formlega úthlutað með samþykki borgarráðs til Alvogen Bio Tech.
-
Melareitur afmarkast af Suðurgötu að austan, Brynjólfsgötu að sunnan, lóðamörkum Hagatorgs 1 og Birkimels 1 og götunnar Birkimels að vestan og að norðan af göngustíg á milli Hringbrautar og Birkimels. Reiturinn er um 35.974 fermetrar að stærð og verða lóðarleigusamningar gerður um þær þjár lóðir sem eru á reitnum á reitnum. Á einni þeirra er Þjóðarbókhlaðan, á annari verður Hús íslenskra fræða og nýting þeirrar þriðju verður ákveðin í samráði borgarinnar og háskólans.
-
Hagareitur afmarkast af Suðurgötu að austan, Brynjólfsgötu að norðan, Dunhaga að vestan og að sunnan af Hjarðarhaga og lóðamörkum fjölbýlishúsanna Hjarðarhaga 24-32 og Dunhaga 11-17. Reiturinn er um 48.775 fermetrar að stærð og verður lóðarleigusamningur gerður þegar nýtt deiliskipulag liggur fyrir. Á reitnum standa Háskólabíó, Endurmenntun og Tæknigarður, svo dæmi séu tekin. Áformað er að á reitnum rísi m.a. hús fyrir Stofnun Vigdísar Finnbogadóttur.
- Fluggarðareitur er suðaustan við Njarðargötu og hefur borgarstjórn veitt Háskóla Íslands vilyrði um að skólinn geti þróað starfsemi sína og uppbyggingu samfellt til austurs í Vatnsmýri. Vilyrðið er með fyrirvara um niðurstöðu skipulagsvinnu og samþykkt deiliskipulags og er háð flutningi starfsemi af svæðinu.