Starfsfólk í leikskólum og frístundaheimilum fær eingreiðslu

föstudagur, 13. október 2017

Borgarráð hefur samþykkt eingreiðslur til starfsfólks leikskóla, frítundaheimila og sértækra félagsmiðstöðva til að mæta manneklu og efla mannauð. 

  • Leikskólastarf
    Málað í leikskólanum Hofi

Borgarráð samþykkti á fundi sínum 12. október að  veita leikskólakennurum og öðru starfsfólki leikskólanna eingreiðslu sem lið í aðgerðum til að mæta manneklu og efla mannauð í leikskólunum. Sú greiðsla kemur til viðbótar eingreiðslu til stjórnenda í leikskólunum sem áður hafði verið samþykkt í ráðinu ásamt öðrum bráðaaðgerðum til að mæta auknu álagi á starfsfólk.  Um var að ræða breytingatillögu meirihluta Samfylkingarinnar, Bjartrar framtíðar, Vinstri grænna og Pírata við viðaukatillögu Sjálfstæðisflokksins.  Heildarfjárhæð vegna þessa nemur 27,3 m. kr. 

Jafnframt samþykkti borgarráð viðaukatillögu Sjálfstæðisflokksins um eingreiðslu til starfsfólks frístundaheimila og sértækra félagsmiðstöðva til viðbótar við áður samþykktar aðgerðir til að mæta manneklu og efla mannauð í frístundastarfinu. Heildarfjárhæð vegna þessa nemur 11 m.kr.

Eingreiðslur til starfsfólks leikskóla, frístundaheimila og sértækra félagsmiðstöðva munu nema 20.000 kr. fyrir hvern starfsmann sem var í fullu starfi í september og  koma til útborgunar 1. desember.

Meðal þess sem áður hafði verið samþykkt sem bráðaaðgerðir í leikskólum til að mæta auknu álagi var aukið fjármagn til heilsueflingar, fjármagn til að fjölga starfsmannafundum utan dagvinnutíma, heimild til að greiða fyrir undirbúningstíma í yfirvinnu og fjármagn til kynningarstarfs til að laða að nýtt starfsfólk. 

Kostnaður vegna þeirra aðgerða  sem borgarráð hefur nú samþykkt til að mæta manneklu og bæta starfsumhverfi starfsfólks leikskóla nemur í heild allt að 155 m. kr.  Starfshópur um nýliðun og bætt starfsumhverfi leikskólakennara kjara- og mannauðsdeild Reykjavíkurborgar hefur aðrar tillögur aðgerðateymis til að bregðast við manneklu til umfjöllunar.

Þá hafði borgarráð samþykkt fjárveitingu til að mæta auknu álagi á starfsfólk í frístundastarfinu og efla liðsheild, s.s. með hærri efnis- og rekstrarframlögum, eingreiðslu til stjórnenda og námsleyfi fyrir starfsmenn. Kostnaður vegna þeirra aðgerða er áætlaður í heild um 32,75 m.kr. Öðrum tillögum aðgerðateymis var vísað til starfshóps um nýliðun og bætt starfsumhverfi í frístundaheimilum og sértækum félagsmiðstöðvum og hins vegar til kjara- og mannauðsdeilda Reykjavíkurborgar.

Sjá frétt um aðgerðir til að bregðast við manneklu í leikskólum og frístundastarfi