Velferðarsvið Reykjavíkur hefur gert samning við velferðarráðuneytið og sjúkratryggingar um dvalar- og hvíldarrými fyrir MND sjúklinga, eða aðra með miklar hjúkrunarþarfir, á Droplaugarstöðum.
Á vegum heilbrigðisráðherra og borgarstjórans í Reykjavík hefur um skeið verið unnið að því sameiginlega að finna ákjósanlega leið til að skapa aðstæður á hjúkrunarheimili fyrir einstaklinga sem þarfnast sérhæfðari þjónustu en unnt er að veita á almennum hjúkrunarheimilum. Niðurstaðan varð að útbúa þessa aðstöðu á hjúkrunarheimilinu Droplaugarstöðum sem Reykjavíkurborg rekur.
Samhliða undirritun samnings um rekstur rýmanna var undirritað samkomulag milli ráðuneytisins og borgarinnar um að ráðuneytið fjármagni nauðsynlegar húsnæðisbreytingar og kaup á nauðsynlegum búnaði og tækjum. Rekstarkostnaður rýmanna þriggja verður greiddur úr ríkissjóði.
Miðað er við að tvö rýmanna verði ætluð fólki sem metið hefur verið í þörf fyrir dvöl í hjúkrunarrými til langframa en að þriðja rýmið verði nýtt fyrir einstaklinga sem þurfa á tímabundinni dvöl að halda eða hvíldarinnlögn sem stuðning við búsetu viðkomandi á eigin heimili.
Reiknað er með að íbúar sem flytjast í varanlegu rýmin tvö séu einstaklingar sem að öðrum kosti þyrftu að dvelja til langframa á Landspítalanum.
Til að meta gagnsemi og árangur þjónustunnar verður gerð úttekt á verkefninu að sex mánuðum liðnum. Úttektin verður lögð til grundvallar við mat á ávinningi verkefnisins. Stefnt er að því að fyrstu einstaklingarnir geti nýtt sér þessa þjónustu innan þriggja mánaða.