Leiðrétting vegna fréttaflutnings af mislægum gatnamótum

Samgöngur Skipulagsmál

""

Fluttar hafa verið fréttir af því að Jón Gunnarsson samgönguráðherra hafi gefið þær yfirlýsingar úr ræðustól Alþingis í gær að ekki hafi náðst samkomulag við skipulagsyfirvöld í Reykjavík um mislæg gatnamót á gatnamótum Reykjanesbrautar og Bústaðavegar en að í samgönguáætlun væri reiknað með því að leggja þar mislæg gatnamót. Borgin standi þannig í vegi fyrir mikilvægum umbótum á sviði samgöngumála. Af þessu tilefni vill Reykjavíkurborg koma eftirfarandi staðreyndum á framfæri:

Fluttar hafa verið fréttir af því að Jón Gunnarsson samgönguráðherra hafi gefið þær yfirlýsingar úr ræðustól Alþingis í gær að ekki hafi náðst samkomulag við skipulagsyfirvöld í Reykjavík um mislæg gatnamót á gatnamótum Reykjanesbrautar og Bústaðavegar en að í samgönguáætlun væri reiknað með því að leggja þar mislæg gatnamót. Borgin standi þannig í vegi fyrir mikilvægum umbótum á sviði samgöngumála. Af þessu tilefni vill Reykjavíkurborg koma eftirfarandi staðreyndum á framfæri:

  • Tillögum um mislæg gatnamót á vegamótum Reykjanesbrautar og Bústaðavegar var hafnað af borgarráði árið 2006, meðal annars með vísan til þess að flytja þyrfti vestari kvísl Elliðaánna úr farvegi sínum vegna framkvæmdarinnar. Þeim var einnig mótmælt harðlega af íbúasamtökum Bústaðahverfis á sínum tíma. Sjá frétt.
  • Í framhaldinu voru unnar tillögur um umfangsminni úrbætur á gatnamótunum og niðurstaðan varð sú að loka vinstri beygju af Bústaðavegi á Reykjanesbraut á annatímum.
  • Síðan þá hafa ekki borist erindi um gatnamótin frá Vegagerðinni til Reykjavíkurborgar.
  • Verkefnið er ekki á samgönguáætlun Alþingis fyrir 2015 – 2018 sem samþykkt var af Alþingi 2016.
  • Það er heldur ekki inni á langtímaáætlun samgöngumála 2011 – 2022 sem samþykkt var af Alþingi 2012.
  • Í tillögu til samgönguáætlunar fyrir 2015 – 2026 er hins vegar lagt til að gerð verði mislæg gatnamót á gatnamótunum á þriðja tímabili og gert ráð fyrir einum milljarði í það verkefni á árunum 2023 – 2026. Sú tillaga hefur ekki verið samþykkt af Alþingi.
  • Það verður því ekki séð að það sé rétt að segja að verkefnið sé nú þegar á samþykktri samgönguáætlun.

Í orðum samgönguráðherra kom einnig fram að gatnamót Miklubrautar og Kringlumýrarbrautar séu hættulegustu gatnamót landsins. Það var hugsanlega rétt fyrir 10 árum en ekki frá því að gatnamótunum var breytt í fjögurra fasa gatnamót árið 2005. Samkvæmt skýrslu Samgöngustofu urðu alls 166 slys og óhöpp (með og án meiðsla) á gatnamótum Miklubrautar og Kringlumýrarbrautar á árunum 2011-2015. Á tímabilinu urðu níu umferðarslys með meiðslum á gatnamótunum. Þau voru í 10. sæti á lista gatnamóta á landsvísu hvað slysafjölda með meiðslum varðar, þótt þau væru ein þau fjölförnustu.

Árið 2005 voru gerðar breytingar á ljósastýrðum gatnamótum Miklubrautar og Kringlumýrarbrautar. Í breytingunum fólst m.a. uppsetning á vinstri beygjuljósum fyrir umferð af Kringlumýrarbraut. Í rannsókn frá 2010 kemur fram að óhöppum fækkaði á gatnamótunum um 37% ef tekin eru þriggja ára tímabil fyrir og eftir framkvæmdir. Alvarlegustu slysunum fækkaði hlutfallslega meira en slysum án meiðsla eftir endurbæturnar.
Sá árangur sem náðst hefur við fækkun vinstri beygju óhappa með meiðslum eftir endurbæturnar sumarið 2005 er eftirtektarverður. Ekkert slíkt óhapp varð fyrstu þrjú árin eftir endurbæturnar en voru að meðaltali 4,7 óhöpp á ári síðustu þrjú árin fyrir endurbætur.