Íbúafundur um hótel, íbúðahótel og heimagistingu í Reykjavík

þriðjudagur, 14. nóvember 2017

Hvert skal stefnt? er yfirskrift opins fundar um hótel, íbúðahótel og heimagistingu í Reykjavík sem hverfisráð og íbúasamtök Vesturbæjar, Miðborgar og Hlíða, ásamt borgarstjóra, standa fyrir. Fundurinn verður haldinn í Tjarnarsal Ráðhúss Reykjavíkur á morgun, miðvikudaginn 15. nóvember, kl. 17 – 18.30.

  • Ferðamenn í miðborginni
    Ferðamenn í miðborginni

Fundinum verður streymt á vefsíðuna reykjavik.is/gisting og þar verða einnig settar inn nánari upplýsingar.

Dregin verður upp mynd af þeirri uppbyggingu sem hefur átt sér stað og þeim kostum og vanda sem hún skapar. Flutt verða erindi um íbúðahótel og heimagistingu, hvaða skilyrðum slík nýting húsnæðis er bundin og hver réttur íbúa er gagnvart slíkri starfsemi. 

Borgarstjóri segir frá áherslum Reykjavíkurborgar og aðrir fyrirlesarar og þátttakendur í pallborði verða frá íbúasamtökum og þeim stofnunum sem sinna skipulagi og regluverki gistinga. Fulltrúi sýslumanns og fulltrúar frá skipulagi Reykjavíkurborgar, atvinnuþróun og heilbrigðiseftirliti verða á staðnum til að svara fyrirspurnum.

Nánari upplýsingar: reykjavik.is/gisting