Teiknaðu og segðu okkur frá þinni afrekskonu. Föstudaginn 25. september milli kl. 12-15:00 munu Ólöf Dómhildur listamaður og Rósa Björk hönnuður bjóða upp á smiðju þar sem þú getur teiknað þína afrekskonu og hún þar með orðið partur af einstakri litabók sem verður til þennan dag.
Hópurinn KÓR –Kolbrún Anna Björnsdóttir, Ólöf Dómhildur Jóhannsdóttir og Rósa Björk Jónsdóttir vinna að útgáfu litabókar sem ber vinnutitilinn KVK litabók en lesa má nánar um verkefnið hér að neðan. Þessi smiðja er hluti af rannsóknarvinnu sem hópurinn vinnur að um þessar mundir.
KVK litabók var gefin út í lítilli útgáfu fyrir myndlistarsýningu árið 2009. Verkefnið fékk athygli á sínum tíma og hefur staðið til að betrum bætta og gefa út í stærra upplagi. Hvatinn að gerð litabókarinnar er sá að í gegnum leik læra börn margt eins og ein góð kona sagði eitt sinn “Nýta skal forvitni og námfýsi barna”. Með því að gefa þeim tækifæri til að læra kvennasöguna og þann hluta menningarheims okkar strax á leikskóla aldri leggjum við grunninn að framtíð þar sem kvenfyrirmyndir eru sýnilegar.
Þær konur sem komu fram í fyrstu útgáfu bókarinnar eru:
Sigríður Tómasdóttir (í Brattholti) (1871-1957) Bríet Bjarnhéðinsdóttir (1856-1940) Vigdís Finnbogadóttir (1930) Jóhanna Sigurðardóttir (1942) Rannveig Rist (1961) Björk Guðmundsdóttir (1965) Vala Flosdóttir (1978) Freyja Haraldsdóttir (1986)