Hátíð í dag í tilefni af heimkomu íslenska karlalandsliðsins í knattspyrnu
Skóli og frístund Skipulagsmál
Íslenska karlalandsliðið í knattspyrnu kemur heim til Íslands í dag, mánudaginn 4. júlí, eftir frækilegan árangur í Evrópukeppninni í knattspyrnu. Af því tilefni er boðið til fagnaðarfundar íslensku þjóðarinnar með landsliðshópnum í miðbæ Reykjavíkur.
Landsliðið mun aka í opinni rútu frá Skólavörðuholti um kl. 19.00 í virðingarfylgd niður Skólavörðustíg og Bankastræti að Arnarhóli. Þar fer fram fagnaðarfundur þjóðarinnar þar sem landsliðshópurinn verður hylltur fyrir frammistöðu sína.
Forsætisráðherra Íslands, Sigurður Ingi Jóhannsson, mun fyrir hönd íslensku þjóðarinnar ávarpa landsliðið á sviðinu við Arnarhól. Forseti Íslands, Ólafur Ragnar Grímsson, verður viðstaddur athöfnina. Fjölbreytt skemmtiatriði verða á Arnarhóli en meðal þeirra sem fram koma eru Friðrik Dór og Erna Hrönn sem leiðir fjöldasöng.
Skemmtidagskráin verður á sviðinu við Arnarhól frá kl. 18.30.
Eftirfarandi aðilar standa að fögnuðinum:
Forsætisráðuneytið, mennta- og menningarmálaráðuneytið, Reykjavíkurborg og bakhjarlar EM-torgsins og landsliðsins: KSÍ, Síminn, Borgun, Coca-Cola, Icelandair, Íslenskar getraunir, Landsbankinn og N1.