Göngugötur í miðborginni á aðventu

föstudagur, 1. desember 2017

Göngugötur í miðborginni verða opnar frá kl. 16. virka daga en frá 12. um helgar fyrir gangandi umferð. Tímabilið er frá 14. desember til 23. desember.

  • Göngugötur á aðventunni
    Göngugötur á aðventunni
  • Göngugötur á aðventunni
    Göngugötur á aðventunni
  • Austurstræti er göngugata
    Austurstræti er göngugata

Aðventa er vinsæll árstími í miðborginni. Birtist það bæði í gleði og fjölda gesta. En eftir því sem nær dregur jólum má búast við miklum fjölda fólks í miðborginni, til að versla, sækja menningu og viðburði eða gera vel við sig á annan hátt í undirbúningi hátíðarhaldanna.

Eins og undanfarin ár verður völdum götum í miðborginni breytt í göngugötur hluta úr aðventunni. Tímabil göngugatna í ár helst í hendur við lengdan afgreiðslutíma verslana í miðborginni og verður því að þessu sinni frá 14. desember til 23. desember.

Frá kl. 16. virka daga en frá 12. um helgar

Göngugötur í miðborginni verða opnar frá kl. 16. virka daga en frá 12. um helgar fyrir gangandi umferð. Göturnar opna fyrir akandi umferð kl. 7. alla morgna og verður því akstur heimilaður um göturnar kl. 7. -16. á virkum dögum og 7. -12. um helgar.

Göngugötusvæðið verður eins og áður Laugavegur og Bankastræti milli Vatnsstígs og Þingholtsstrætis, Skólavörðustígur neðan Bergstaðastrætis, Pósthússtræti milli Kirkjustrætis og Hafnarstrætis og Austurstrætið ásamt Veltusundi og Vallarstræti.

Vert er að benda bílstjórum á að nota bílahúsin en auðvelt er að sjá hvar þau eru og hversu mörg stæði eru laus á vefsíðunni http://bilahus.is/