Átta skólar kepptu til úrslita á æsispennandi hæfileikahátíð í Borgarleikhúsinu í gærkvöldi. Sjónvarpað var beint frá hátíðinni þar sem hátt í tvö hundruð grunnskólanemar í borginni létu ljós sitt skína.
Svo fóru leikar að Komohewa - Boðflennan, litríkt og líflegt söngva- og dansatriði sem nemendur í Árbæjarskóla settu upp, fór með sigur af hólmi. Í öðru sæti urðu nemendurí Langholtsskóla og í því þriðja nemendur í Réttarholtsskóla.
Hinir skólarnir fimm sem kepptu til úrslita á lokakvöldi Skrekks voru Austurbæjarskóli, Breiðholtsskóli, Foldaskóli, Hagaskóli og Rimaskóli. Mikil spenna og gleði ríkti í salnum á meðan á keppninni stóð og hvöttu áhorfendur sína skóla óspart áfram.
Dagur B. Eggertsson borgarstjóri afhenti nemendum í Árbæjarskóla sigurlaunin, Skrekksstyttuna eftirsóttu, við mikinn fögnuð sigurvegara sem annarra.
26 grunnskólar tóku þátt í Skrekk að þessu sinni og hátt í 1000 ungmenni dönsuðu, léku og sungu á stóra sviði Borgarleikhússins á þremur undanúrslitakvöldum áður en sjálf úrslitahátíðin hófst. Aldrei hafa fleiri skólar verið með í Skrekk. Sérlegt ánægjuefni var þátttaka Klettaskóla í hæfileikakeppninni en nemendur þar sem glíma við ýmsa fötlun stigu nú í fyrsta sinn á stokk í keppninni.
Dómnefnd skipuðu stjórnendur menningarhúsa í borginni; Borgarleikhússins, Þjóðleikhússins, Hörpu, Íslenska dansflokksins, ungmenni úr ungmennaráði Samfés og formaður dómnefndar var Sigfríður Björnsdóttir deildarstjóri listfræðslu hjá skóla- og frístundasviði Reykjavíkurborgar.