English translation
Hi! The English site is only a beta for now and still has many errors (especially in names and locations).
We are working hard to fix them and making more content available than ever before so expect constant updates.
Reykvískir kennarar ætla að fjölmenna á ráðstefnu á öskudaginn 22. febrúar þar sem leitað verður svara við því hvert grunnskólinn stefni og hvernig hann standi sig í samanburði við önnur lönd. Öskudagsráðstefnan er að þessu sinni skipulögð með tilliti til þess að verið er að innleiða nýja aðalnámskrá. Athyglinni verður beint að grunnskólanum í dag einkennum hans og þróun í alþjóðlegu samhengi. Farið verður í stöðu og starfshætti grunnskólans, þarfir framtíðarsamfélagsins fyrir nýsköpun og fjölbreytta þekkingu, nýjar leiðir til kennslu og námsmats og mótun menntastefnu. Innlendir og erlendir fræðimenn með mikla yfirsýn yfir skólastarf í heiminum gera grein fyrir því sem best er gert á þessu sviði.
Vel á sjöunda hundrað kennarar eru skráðir til leiks en yfirskrift ráðstefnunnar er Grunnskólinn – Hvaðan kom hann? – Hvert er hann að fara? – Hvað er hann?
Fjórir fyrirlestrar verða haldnir á ráðstefnunni:
Dr. Stéphan Vincent-Lancrin frá Miðstöð menntarannsókna og nýsköpunar hjá OECD mun fjalla um hvaða færni og námsgreinar eiga að vera í forgrunni í samfélagi sem leggur áherslu á nýsköpun.
Peter Gerlach, ráðgjafi Mckinsey-stofnunarinnar í Stokkhólmi, mun fjalla um niðurstöður alþjóðlegra rannsókna á grunnskólastarfi og um stöðu grunnskólans í framtíðarsamfélaginu.
Dr. Ingvar Sigurgeirsson prófessor og Ingibjörg Kaldal verkefnastjóri við Háskóla Íslands munu segja frá niðurstöðum nýrrar viðamikillar rannsóknar um starfshætti í grunnskólunum og nefnist fyrirlestur þeirra Að hvaða marki eru nemendur fullgildir og virkir þátttakendur í skólastarfinu?
Sigurjón Mýrdal, deildarstjóri í mennta- og menningarmálaráðuneytinu, fjallar um nýja aðalnámskrá, íslenska menntastefnu og mótun hennar í alþjóðlegu samhengi.
Ráðstefnustjóri er Dr. Anna Kristín Sigurðardóttir, lektor í skólaþróun og deildarforseti Kennaradeildar Menntavísindasviðs Háskóla Íslands.
Öskudagsráðstefnan, sem er stærsti fagvettvangur íslenskra grunnskólakennara, er á vegum skóla- og frístundasviðs Reykjavíkurborgar í samstarfi við Kennarafélag Reykjavíkur og Félag skólastjórnenda í Reykjavík. Hún verður á Hilton Reykjavík Nordica miðvikudaginn 22. febrúar og hefst kl. 13:00.
Sjá dagskrá