English translation
Hi! The English site is only a beta for now and still has many errors (especially in names and locations).
We are working hard to fix them and making more content available than ever before so expect constant updates.
Dagana 23. og 24. febrúar verður vetrarfrí í flestum grunnskólum Reykjavíkur. Frístundamiðstöðvar, félagsmiðstöðvar og sundlaugar Reykjavíkurborgar bjóða upp á fjölmarga viðburði í vetrarfríinu.
Í Hlöðunni við frístundamiðstöðina Gufunesbæ í Grafarvogi verður efnt til skákmóts fimmtudaginn 23. febrúar og Hlöðubingós föstudaginn 24. febrúar. Báðir viðburðir hefjast kl. 12:30 og eru ætlaðir fólki á öllum aldri. Sjá nánar á heimasíðunni www.gufunes.is.
Í miðborginni efnir frístundamiðstöðin Kampur til fjölskylduhátíðar við Barónsstíg fimmtudaginn 23. febrúar undir yfirskriftinni Leikstræti –lokað fyrir umferð opnað fyrir leik. Kampsráð unglinga í 8. - 10. bekkjum Austurbæjar-, Háteigs- og Hlíðaskóla kemur að skipulagi Leikstrætis og tekur þátt í umsjón viðburðarins sem hefst kl. 14:00. Dótakassinn verður opinn, flugdrekar settir á loft, gatan skreytt með krít og tómbólur haldnar til styrktar UNICEF. Þá býður Sundhöllin gestum Leikstrætis frítt í sund frá kl 14:00 - 16:00.
Sjá nánar á heimasíðunni www.kampur.is
Í Vesturbæjarlaug verður efnt til fjölskylduleikja föstudaginn 24. febrúar kl. 14:30 - 16:30. Þetta eru leikirnir Wipeout og Minute to win it sem hafa verið vinsælir í sjónvarpsþáttum. Félagsmiðstöðin Frosti býður upp á vöfflur meðan birgðir endast. Að auki stendur frístundamiðstöðin Frostaskjól fyrir ýmsum viðburðum fyrir unglinga í vetrarfríinu og öskudagsballi fyrir 5. - 7. bekk fimmtudaginn 23. febrúar kl. 16:30 - 19:30.
Sjá nánar á heimsíðunni www.frostaskjol.is.
Fimmtudaginn 23.febrúar efnir Frístundamiðstöðin Kringlumýri til sundleikja fyrir alla fjölskylduna í Laugardalslaug. Dagskráin hefst kl 12:30 með ýmsum leikjum, farið verið í tímatöku í rennibrautinni, sundknattleik og fleira. Starfsmenn úr félagsmiðstöðvum Kringlumýrar munu stjórna dagskránni. Þá verða öskudagsskemmtanir í Bústöðum og Tónabæ miðvikudaginn 22. febrúar. Nánari upplýsingar um opnunartíma félagsmiðstöðvanna má finna á heimasíðunni www.kringlumyri.is
Bláfjöllin skarta nú sínu fegursta. Þar er nægur snjór og lyftur opnar ef veður leyfir. Því væri alveg tilvalið að skella sér á skíði í vetrarfríinu.
Sjá nánar á heimasíðunni www.skidasvaedi.is.
Benda má á skemmtilega afþreyingarkosti í hverfum borgarinnar á ,,Ævintýri á heimaslóðum“ þar sem búið er að kortleggja hverfin og safna saman fjölmörgum hugmyndum og tillögum að því sem hægt er að gera, s.s. á útivistarsvæðum og söfnum.
Þá verða sundlaugar borgarinnar opnar eins og venjulega þar sem hægt er að eiga gæðastundir.