English translation
Hi! The English site is only a beta for now and still has many errors (especially in names and locations).
We are working hard to fix them and making more content available than ever before so expect constant updates.
Undanfarnar sjö vikur hafa börnin í Dalskóla tekið þátt í viðamikilli smiðju undir yfirskriftinni Læsi í dalnum. Dalskóli fékk styrk úr þróunarsjóði skóla- og frístundaráðs til að gera smiðjuna sem best úr garði og nýta árangurinn til að byggja upp heildstætt móðurmáls- og lestrarnám.
Börnin hafa m.a. verið að setja saman myndasögur, unnið með bókmenntir, bókagerð, leikræna tjáningu og orðtök- og málshætti. Börn í frístund fóru á rölt um hverfið og bönkuðu upp á hjá fólki og fengu að lesa fyrir það. Þá fengu öll Dalskólabörn gæðatexta með sér heim til að lesa fyrir eða með foreldrum sínum. Allir voru með bók í hönd öllum stundum.
Eins og áður voru börnin dugleg að fara í heimsóknir í sínu nærumhverfi. Börn á Huldu- og Trölladal og 5 og 6 ára börn fóru í heimsókn á bókasafn og tóku þátt í verkefni um kvæðaarfinn í Gerðubergi. Börn í 3.-4. bekk fóru á leiksýningu í Norræna húsinu og börn í 3.-5. bekk lásu og sungufyrir gesti við afhendingu íslenskuverðlauna skóla- og frístundaráðs í Hörpunni.
Í skólann komu líka margir góðir gestir í tengslum við smiðjuvinnuna. Söngvaskáldin Svavar Knútur og Aðalsteinn Ásberg komu og fjölluðu um Stein Steinarr, börnin í 1. og 2. bekk fengu hjálparbeiðni frá Kristínu Helgu Gunnarsdóttur rithöfundi en hún hafði týnt handriti að bók sem átti að koma út um jólin. Börnin fundu handritið og skiluðu því í prentsmiðju. Kristín Helga kom svo síðar og las upp úrhandritinu fyrir börnin. Berglind sögukona kom og sagði börnum á leikskólaaldri sögur. Tryggvi Gunnarsson leikari hitti börnin á Álfabjörgum og sagði þeim sögu. Ásrún Kristjánsdóttir hitti börn í 3.-4. bekk og fjallaði um tilurð sögunnar Áslaug í hörpunni og sagði frá þróun myndverka í henni en faðir hennar, Kristján Friðriksson samdi söguna.
Að vanda lauk smiðjunum með sýningu. Börn á grunnskólaaldri buðu foreldrum og nánustu ættingjum að koma í skólann föstudaginn 7. desember. Þar sýndu þau þeim afrakstur vinnu sinnar með sýningu á sal auk þess sem gríðarlega stór bók var sýnd. Börn á leikskólaaldri buðu foreldrum á sín smiðjulok fimmtudaginn 13. desember og fluttu leikrit og sungu fyrir gesti. Að smiðjunni lokinni hélt foreldrafélagið sína árlegu jólaskemmtun.